q8_fireman
10-15-2006, 04:46 PM
السلام عليكم أنا فتاة عمري 15 سنه متربيه مع عائله متحابه مع بعض ومتكونه من أمي , أبوي, أخوي وأنا . أخوي عمره 17 سنه واحنا نحب بعض واايد كأخوان وكل أسراره عندي وأنا كل أسراري عنده ….المهم يوم من الأيام أمي وأبوي كانوا طالعين مشوار ورادين بس للأسف ما ردوا صار حادث كبير ومن كثر ما هو كبير كان ما في أمل انهم يعيشون وتوفوا وكانت لي هذي صدمه كبيره والصدمه الثانيه أن أحنا ماعندنا اهل.. أبوي وحيد أمه وأبوه حتى أمي نفس الشي واحنا عندنا جيران وعندهم بنت كبري وهيه معاي بالمدرسه وكانت صديقتي العزيزه عندي …واحنا احوالنا الماديه ممتازه والحمدلله وكنا يايبين سائق عشان يوصلنا مشاويرنا وانا واخوي كنا عايشين بروحنا وانا علاقتي مع اخوي وايد وهوه كل يقولي انه يكلم بنات وانا عندي عادي ..صار عمر اخوي 18 وقام يسوق ويوم من الايام قالي امشي خلينا نطلع انروح المطعم مع رفيجته وانا كنت مو مطمنه لها حاسه ان وراها شي.. قلت له اوكي ورحنا وكانت معانا رفيجته وكان اخوي طول الوقت يقولها ترى انا احبج اكثر وحده بالدنيا وحتى اكثر من نفسي .اهوه قال جذي انا طلعت ورحت البحر اللي قبال المطعم وقمت ابجي. اقول اشلون اخوي يقول جذي وانا وين رحت وبجي ولا اييلي واحد شاب يقول لي: عسى ما شر اشفيج؟ قلت له: مافيني شي قال: امبله فيج شي؟ قلت له: ماابي اشغلك في مشاكلي قالي: اشدعوه عاد وانا من كثر ماني منقهره ومتضايقه قلت له: عن اخوي ولا يقول لي: هاج رقمي دقي علي اوكي؟ قلت له: اوكي ولا اييه اخوي قالي: يلا بنروح رحنا السياره ولا يقولي: اشفيج رحتي ؟قلت له: مافيني شي اهوه سكت عاد قلت له: ترى في واحد عطاني رقم بكلمه؟ قالي: اهوه اشلونه؟قلت له: خوش واحد قالي: اوكي كيفج … وكنت اكلمه وكنا نحب بعض وكنا نطلع مع بعض …..... في الايام الاخيره كان اخوي يتأخر بليل كان يطلع ويتأخر يوم من الايام رجع البيت وكان طالع مع رفيجته قلت له: اشفيك متأخر؟ولا يرد علي معصب مالي خلقج ذلفي عن ويهي قلت له: اشفيك اتكلمني جذي؟ولا يقول: هذي اللي تبيني اذبحها قلت لج ذلفي عن ويهي.. وانا رحت غرفتي وقمت ابجي اول مره اخوي يعصب علي دقيت على رفيجتي قلت لها السالفه ولا تقول: اهوه كان طالع مع منو؟قلت لها: مع رفيجته ولا تقول لي: دقي عليها سأليها سديت التليفون ودقيت على رفيجته سلمت عليها لو ترد علي بنفس قلت لها: اشفيج تكلميني جذي؟ولا تقول: كيفي انتي اشتبين ترى انا ما احبج انا اكلمج مصلحه بس علشان اخوج خلي بروحه انتي شكو فييه ولا تسد التليفون …صار اليوم الثاني قلت حق اخوي عن السالفه عن رفيجته ولا يقول: صج انج جذابه هذي مستحيل تقول هل حجي انتي ماتحبينها وتقولين هل حجي عنها اهيه شنو سوت فيج عشان تقولين هل حجي؟ ومن يومها كل يعصب علي بس يصرخ علي وانا ما ادري شنو اسوي انا مالي في هل دنيا غير ربي ثم اخوي.. اخوي فلت مني بعد ما يندرى عنه اخاف يطردني من البيت ؟كل ما اكلمه ما يرد علي ما ادري شنو اسوي كله من رفيجته اهيه اللي فرقتنا حسبي الله عليها....