البنيه والريال :\

[sweet_angel]

الريال لما يسافر بروحه ... هو !! ريال بعد ما يحتاج محرم

وإذا سوا علاقات ..... هو!! ريال شايل عيبه

اذا قعد بالدوانيه مدة طويله .... خو شنو بعد!! قاعد يلعب جنجفه ومع الربع ريال عادي ..

يروح يتزوج أربع .. هو!! ريال والشرع حلل اربع ..

متقاعد وما يقعد بالبيت ...هو !! بعد ريال وبيطلع شنو نحكره..

ما كمل دراسته .. عادي شنو اهوه ريال ..!!

طول لسانه على امه .... حتى الام ما تعرف ترد عليه .. بعد شسوي ريال ويفتهم ..!!


يروح برا وياخذ امريكيه .. والكشره من هني لي اهني ... ولدنا خذا امريكيه بعد ريال ..

شرى سيايير وكسرهم .. يلا فدوه ... بعد ريال ..

يسافر برا علشان يكمل ويصرفون عليه دراسته يروح يلعب ويرد ماكو شهاده ... يلا ريال ..

يقطون عليه اشتراك نادي وما يداوم ... عادي ريال !!

يحطله شو تايم بداره بس انتي لاء حتى لو أصغر منج... عادي !! ريــــــــــال ..


لا يرفض له طلب ... ليش !! بعد .. ريــــــــــال ..

يلا نشتريله سيكل ... يلا بعد صار ريـــال ..

يروح يدرس بره بالمكان اللي يبيه .... ريال وما ينخاف عليه !!

بقي والا بانشي ... أفا عليك بس ..!!

لما ولدهم يسوي مشكلة مع بنات الناس ..... بنت الذين قصت على ولدنا .. ‍‍!! وإلا ولدنا اصلا ريــــال والنعم ..

الولد من اول ما يبلغ... أثنين يسويهم ... يشرب زقاير ويتعلم الحجي الوسخ ..... ليما يكبر مع الرياييل بالدوانية و...يستمر ...يستمر ... هو !! بعد سوالف رياييل ..

عادي ما لقا شي بالكبت .. خمط دشداشه وطلع ....!!

انا مشغول روحي انتي ييبي العيال ...!! بعد مسكين رب الاسره...بعز الشمس ... انتي قطي العيال ... تعبان وراد من الدوام ..!! جنا اهيه مو راده من الدوام نفسه ...!! هذا والرجال قوامون على النساء !!


..أما المرأه يا عيني عينج .. والله مسكينه خنت حيلي

يما ابي اطلع اروح كافي ....انثبري يلا ماكو سالفه .... !!

ابي اشترك بنادي ..... عن الخرابيط انتي تلحلحي سويلج شغله بالبيت ....!!
سفر تسافرين بعد هذا اللي ناقص .... لازم محرم !!لا وفي فتوه يديده ما تدخلين النت ... الالا بوجود محرم....!!

شنو بديكير منيكير ... شهالخرابيط ..!! طول عمرنا نسويهم بالبيت ...


كلا تبين هدوم ... هدوم ... وكلا ما عندي .. قمي زين !!


شنوووو ... طالعه على البحر اليوم !! .... حشى رايحه ديسكو مو رايحه البحر ... جنه الوحده مسويه شي محرم ....!!

تقفل الدار .... انتي اشعندج كل ساعه قافله الدار .....!!بعد شنو الواحد ما عنده خصوصيه ... يعني ما اقفل الدرا الا قاعده اسوي شي مو زين !!

شنو تبين سياره باب واحد ... سبورت ... لا ماكو .. انتي بنيه تسوقين جذي ..!! حتى بالسيايير ...!!

ابي اشترك بدوره .... من 5 لي 8 .....شنو !!! وانشاء الله متى تردين البيت على 9 ولا 10 !! ..... يلا مـــــــــاكو


شنو هالخرابيط اللي شاريتها .... أي أي فسفسي الفلوس !! ... أي معاشي وكيفي ..... والله حاله !!

المرأه تدرس .. تشتغل .. تحمل.. تولد.. تربي وتدرس العيال وتودي وتييب ..!! وفوق هذا يقولون الشرع يقول المرأه ناقصه عقل ودين ... ويفسرون القرآن على كيفهم ...

المرأه تبي تتمشى بالسيارة على راحتها ..... ما تقدر ...!! يجيها موكب يغثها في ليلتها ليما ترد البيت

تبي تروح تسوي رياضة بالممشى .... هم ما تقدر !! ( وراك وراك وراك منين ما تروح وراك ....!! شهالبلشه !! )

تبي تقعد تتامل البحر لما يكون ضايق خلقها .. هم ما تقدر !! ( إلا يايتها شلت عقد .... يا حلوه .. تعالي تعالي !! ..... قطع)

نبي نحتفل بالعيد الوطني ... نبي تستانس .. هم ما نقدر .. لانه المطافيق وايد !!لا ولو تقولين للشرطي شوفهم يقولج شمطلعج !!! ...... شنو مو اوادم !!

بس نقول الحمد الله على كل شي ... الوقت اختلف والناس تغيرت

[الــســفــيــر]

موضوعج فيه انحيازيه للبنات


بس هذا ما اقولج انه كلامج غلط لا كلامج صح وكل شي يصير وفيه الشين وفيه الزين

بس انج تذكرين تتكلمين عن الريايل انهم ماعليهم شرها بما انه ريال وتتكلمين عن البنات انهم مساكين ودوم مضلومين ومايسون شي لا هذا غلط

اذا حبيتي تطرحين موضوع للنقاش

اتمنى انه يكون موضوع متكامل لا فيه انحيازيه ولا شي

وشكرا سويت انجل

[sweet_angel]

مشكوور يا السفيير على مشاركتك بس حبيت اقولك لااا مو انحيازيه ولا شي هذا الموضوع كاتبينه بمنتدى وكتبته بس انا كل يوم اكتب موضوع هالمره عن البنات وهالشي ما تقدر تقول ان غلط صح وصاير وما تقدر تنكره صج الوضع تغير وصار وايد تغييرات بس همن هالشي للحين متوارد وهالكلمات للحين تنقال صح ولا لا ؟؟

[sweety]

ثنكس على موضوعج
وما اقدر اقول لج غيييير ناااااااااااااااااااااااااااااااااااس

[Makaveli The Don]

صراحه انحياز واضح للبنات وكأنج قاعده تصورين مسلسل درامي حزين في المرأه مظلومه ومغلوبه والرجل ظااالم وشر الدنيا كله متجمع فيه ..... لازم تفهمين نقطه مهمه وهي ان المساواه بين الرجل والمراه الي تسمعون عنه والي مسوين له بهرجه إعلاميه كله كلام فاضي وخرابيط .. العلاقه بين الرجل والمرأه علاقة تكامل وليست علاقة تساوي!! قال تعالى : (( للذكر مثل حظ الأنثيين )) صدق الله العظيم. يعني انا قلت رايي إستناداَ على الشرع وإسمحيلي اذا تكلم الشرع الكل يقول سمعنا واطعنا :)

[NaZy AlMoStAqIlla]

اظم رايي لماكافيللي
و ماودي اطول عليكم
مع انه عندي كلام وايد
و اعتراضات كثيييييييييره
على الموضوع
بس بقول عن جم شغله
هذا الشي يمكن عندج تصير او البنات الي مثلج
بسبب عدم الثقه
و ترى مو كل الصبيان عندهم الشغلات الي قلتيها ولا يقدرون يسوونها
عن نفسي انا عندي كل شي الحمد لله لانه في ثقه بيني و بين ابوي و هذا الجواز يمي متى ما ابي اسافر اسافر ما يقولي شي لان ابوي واثق فيني و بالنسبه للحكم بين المراه و الرجل هذي شغله نسبيه بين الناس او الوالدين في من يساوي بينهمفي من يفرق و احيانا يكون معاه حق
مثال : سالفة البوي فرند متى ما وقع المحظور بينهم الولد جنه ما صار في شي بس البنت شقول خلاص فقدت اعز ما تملك و ما تقدر ترده ولا تقولين لي ترقيع هذا فيه غش و ضحك على الذقون
و بس ادري طولت
مشكوره سويت انجل على الموضوع الحلو و نقل موفق
و دايما مميزه بالمناقشات
و اتمنى انه يصير تفاعل اكثر بهذا القسم
و دمتم :)

[sweet_angel]

مشكورين على راييكم وكل واحد عنده راي بس هالشي ما تقدرون تنكرونه في بعض الاهالي للحين عندهم هالشي ومتحفظين علييه الريال غير عن المرا الريال يقدر يسوي اي شي اما المرا كلمه وحده لها عيب ولا تقولون لا هذا قبل والحين غير بلا انا على الي سمعته من ناس والقصص الي اقراها حتى انتو ما اعتقد ما سمعتوا للحين ان هالشي للحين مستمر عن بعض العوايل وانا كتبت هالموضوع حق هالفئه هالخاصه ( وانا بالعكس لا متحيزه حق البنات ولا حق الرياييل انا بالنص الصح صح والغلط غلط وعالعموم هالموضوع منقوول يعني هالكلام مو من عندي ) وانا مثل ما كتبت بموضوع ثاني ان الريال غير عن المرا بامور مو مثل هاذي مثل ما هالفئه متصوره لا بامور ديينا الاسلامي قال عنها ومشكورين .. :)

[Ayed]

مشكووره سويتي على الموضوع


وهذي الدنيا الرجال غير والمراه غييييييير

[sweet_angel]

العفووو ويسلموو على المرور :)